انا راجل


انا راجل

أنا علاء القمحاوي من تيت راديو دوت كوم وراجل قوي راجل راجل يعني
ده اللي انا مقتنع بيه، واللي ذكور كتير قوي مقتنعين بيه في نفسهم
بس انا لازم اكون صريح واقوللكم اني لحد دلوقتي مش عارف انا بنيت اقتناعي ده على ايه بالزبط
لأني مش عارف يعني ايه رجولة أساسا.. يعني مش عارف امتى الذكر بيتحول لراجل.. وليه؟؟؟
فيه ناس قالتلي ان الرجولة هي الجدعنة والشهامة وحفظ الأصول والأخلاق والحاجات دي.. بس ما دي صفات برضه ممكن تبقى موجودة في أي واحدة ست.. يعني صفات إنسانية مش صفات رجولة بس
الراجل مثلا هو بيصمد في الحق وما بيرجعش في كلمته وبيحفظ العيش والملح وبيقف جنب اصحابه واخواته وأهله؟؟؟
برضه ممكن الصفات دي تبقى موجودة في واحدة ست، ولو الرجولة تعريفها كدة، يبقى الست دي آخر رجولة

الراجل له في السياسة؟؟ الستات كمان ليهم في السياسة
الراجل له في الكورة والحشيش والهلس؟؟؟ الست برضه ممكن يبقالها في الكورة والحشيش وأم الهلس

فيه صفات زي الرغي والكلام في الهايفة وزي الجبن والبخل دي صفات غالبة في الجنس اللطيف... ممكن نقول ان الرجولة هي ان الراجل ما تبقاش فيه الصفات النسائية دي... بس برضه نرجع ونقول ما يمكن فيه ستات مافيهاش الطباع دي,, وبرضه مش رجالة

قشطة .. كدة مش فاضل غير اننا نعترف ان الرجولة نفسها صفة إنسانية ممكن تبقى في الستات زي ما هي في الرجالة.. أو إننا نمسح كل الحوار اللي فات ده ونقلع هدومنا ونقف قدام المراية ونبص على الميزة الوحيدة اللي بتميزنا ونقول اننا فعلا رجالة