أنا ودودو


كعادتى أصل إلى البيت فى اوقات متاخرة من الليل لاجدها جالسة الى الكمبيوتر

انا: حرام عليكى ارحمينى شوية بقى نفسى اخش مرة اعرف اقعد على الجهاز مرة

دودو تكتفى بنظرة قرف ليا ومتردتش عليا نهائى

انا: امتا بقى الواحد يخلص من القرف ده

دودو تتنرفز عليا: منتا طول النهار قاعد عليه

أنا: طيب المهم هتخلصى امتة

دودو: مش عارفة

كل يوم نفس السيناريو وتنتهى الحكاية على كدة بعد شوية زعيق كتير

بعد كدة اخش اعمل اتنين شاى ليا انا ودودو واروح احطهلها قدمها على الكمبيوتر

انا: خدى الشاى فى المج بتاعك اهوة

دودو: شكراً

انا: دقيقة وحدة وهعملك احلى سندوتشين فيكى يا مصر

دودو: لالالا...مش عايزة اكل نهائى...تعالى بس شوف التدوينة دى

انا: قشطة هجيب الاكل واجى على طول

اخش المطبخ اعملى العشا بتاعى واروح اقعد جمبها تقوم هى قايمة وتيجى تاكل معايا

ونفضل نضحك انا وهى قوى عشان ده الطبيعى كل يوم تقولى مش هاكل واول ما اجيب الاكل القيها قعدت قبليا

نتعشى انا وهى وبعدين هى تقوم تعمل شاى وانا اقعد اقرا التدوينة بتاعتها

انا: دودو التدوينة حلوة بس...دودو انتى قبضتى ولا لسه

دودو:خش فى الشنظة بتاعتى خد منها اللى انتا عايزة

انا:يابنتى مش قصدى انا بطمن لتكونى عايزة فلوس ولا حاجة

انا ودودو:ههههههههههههههههههههههههههههههههههههه

انا:مش هاخد كتير على فكرة

دودو:براحتك يا عم ...وشوف الكمبيوتر لو عايزة انا خلصت خلاص
انا:لا خلاص تعالى نتفرج على أم بى سى 4

انا:شايفة يا دودو ولاد الكلب عايشين ازاى وشايفة الالوان لون المية مع السما مع الزرع مع الورد مع الرمل

دودو:تعرف انا بخرج الصبح وبفضل طول اليوم شايفة مصر كلها ابيض واسود شوارع وعربيات وناس ووشوش

انا:بقولك تيجى نهاجر انا وانتى

دودو:ياريت والله

نفضل نرغى كتير قوى مع بعض والساعة دقت السادسة صباحاً

انا:يلة بقى نقوم ننام عشان بابا زمانة هيصحى ولو لقانا صحيين هيقعد يشتغلنى وانا مش ناقص

دودو:قشطة تصبح على خير

انا:تصبحى على خير

دودو:اه صح نسيت بص لو صحيت قبل 5 المغرب صحينى معاك

انا:ههههههههههههههههههههههه

............................................................................
تفتكرى يا دودو انك تكلمينى تصحينى من النوم واكون بحلم بيكى صدفة

انا كنت بعيط وبعدين رحت فى النوم على سريرك وحلمت بيكى وانتى صحتينى من قبل الحلم على تليفونك

لو دى صدفة طيب امبارح

الساعة اربعة ونص صباحاً كنت نايم فى الارض فى الاسماعيلية وبحلم بيكى برده فى يوم فرحك بس كان فرح مختلف نهائى عن الفرح بتاعك واتصلتى بيا بردة وانا بحلم بيكى

تفتكرى دى صدفة بردة
على فكرة متتصليش بيا تانى الساعة 4 ونص صباحاً عشان مبقتش اعرف اسهر لوحدى