هاكل خنزير وهشرب ويسكى



يوم الاحد
الساعة 10 ونص صباحاً
المطار القديم
تعلن شركة مصر للطيران عن قيام بعض من رحلاتها
فيودع اقاربة المتجهين الى فرانكفورت ثم يختفون عن انظاره
يقف متأمل كل وجوه المحيطين بيه
يسحره جمال الفتيات الالمانيات الواقفين الى يمينة
وعلى يساره اسبانيات جميلات
وامامة فرنسيات رشيقات
ولكنة فشل فى استيعاب كل هذا
يغمض عينه للحظات ليحاول استيعاب الامر
ثم يفتحها ليجد مصريات محجبات عابرين من امامة
كانت صدمة شديدة جداً بالنسبة له...كانت اشبه بصدمة كهربائية لمريض الفلات فووت
اغمض عينية مرة اخرى للحظات..محاولاً نسيان الامر
وسأل نفسة؟؟؟؟
المفروض اننا مسلمين...يعنى معظمنا هيخش الجنة...مش بناكل خنزير ولا بنشرب ويسكى
وهما مش مسلمين..يعنى معظمهم مش هيخش الجنة..بياكلو خنزير وبيشربوا ويسكى
ليه هما كدة وليه احنا كدة؟
ليه بجد هما كدة واحنا كدة؟
لو كدة هاكل خنزير وهشرب ويسكى


22 comments:

حدوته مصرية said...

ولو انى مفهمتش انت قصدك ايه يعنى بالظبط لكن هحاول ارد
لك انت تفخر بأن الله جعلك مسلم و تعرف الاسلام و اكرمك

انما حكاية تاكل خنزير ولا تشرب ويسكى اللى انا مش فاهمها دى انت حر يعنى بس انت عارف النتيجة انما هما مش عارفين فربنا يهديهم يعرفوا

و متقولش ليه فى حكم ربنا!!

تحياتى

أحمد حربية said...

احم..هوه أنا عندي سؤال صغير كده من غير احراج يعني...هوه اللي عنده فلات فووت بياخد صدمات كهربية ليه؟؟..أما بقي بالنسبة لصلب الموضوع فافي ناس كتير بياكلوا لحم خنزير وبيشربوا ويسكي وبرضه ماهماش كده!!...يبقي الأحسن بقي نستني علشان ندخل الجنة ونلاق اللي أحسن من كده 1000000 مرة

أحمد

الحلم العربي said...

بسم الله الرحمن الرحيم
"آلم..أحسب الناس أن يتركوا أن يقولوا آمنا و هم لا يفتنون...و لقد فتنا الذين من قبلهم فليعلمن الله الذين صدقوا و ليعلمن الكاذبين"

لو فاكر انك لو شربت ويسكي و أكلت خنزير هنكون زيهم أحب أقولك انك بتطلب المستحيل لأنك مش زيهم ...هما سبب في اختبار لبعض المسلمين اللى بيغرهم المنظر و مش بينظروا للجوهر

الدنيا سجن المؤمن و جنة الكافر و طبعا انت حر عايز تستسهل دلوقتى و تصعب عليك بعدين و لا عايز تتحمل شوية دلوقتى علشان تنجح في الامتحان و ترتاح بعدين


التأمل جميل لكن لازم يكون في أرض صلبة نقف عليها علشان ما نتغرش في الأزاز و نفتكره لؤلؤ و احنا عارفين كويس ان اللؤلؤ ربنا حجبه في قاع البحر جوة القواقع علشان ميعرفش يوصله غير اللى يستاهله بجد ...و حجاب المسلمات كذلك

تحياتي لك

rana 3amra said...

عموما عنيك السمرة ممكن تخبيها بلينسيز
وشعرك المسمر ممكن تصبغه اصفر وبتعرف تتكلم انجليش لو مكسر شغال يعنى مش مشكلة
كدة خلاص يا معلم كله تمام
الوقتى بقى تحب تعيش فين هنا ولا هناك مش مهم هنا ولا هناك مش دى القضية بس تعرف بقى يا معلم تغير الشخصية اللى ف عهدتك طول منتا عايش ؟!! اشطات عرفت
ابقى قابلنى بقى لو لقيت نفسك تانى لو قلعت اللينسيز وغسلت شعرك من الصبغة
مش بتحامل بس دة متهيالى اى واحد عايز يتامرك ويتغير وخلاص

بقولك ايه انا ليا صاحبة بس مش مسلمة تفتكر يا مفتى انها مش هاتدخل الجنة زينا يعنى احنا يا مسلمين اصلنا ع حسب كلامك كلنا داخلين الجنة قول يا رب قريبا

مش عارفة ليه لاول وهلة كدة لما قريت الموضوع حسيت بطائفية تشحن جو المدونة

بقولك انت ليه مسحت الموضوع الصبح ورجعته تانى الصورة اللى فاتت احلى :)

أسوور said...

ومين اللى أكدلك انهم مش هيدخلوا الجنة ومين اللى أكدلك اننا مش هندخل النار

يا ابنى

من عمل مثقال ذرة خيرا يره ومن عمل مثقال ذرة شر يره

مالقالش مين بالظبط ..يعنى أى حد هيعمل خير واى حد هيعمل شر
تحياتى

حلم الحرية said...

مممممممم
متهيالي مريض الفلات فوت والصدمات الكهربية ملهمش علاقة ببعض

اما بقي بخصوص المقارنة
متهيالي المقارنة متنفعش

متنساش وانت بتقارن بالناس دي انك تاخدالباكت كله علي بعضه
يعني متتكلمش عن جمال البنات واكلهم وشربهم
وتنسي نسب الانتحار العالية والتفكك الاسري والانحلال الاخلاقي وغياب اي قيم روحية عندهم باعترافهم هما نفسهم

يا تري حيبقي نفسك برضة تاكل خنزير وتشرب ويسكي وتبقي زيهم
ماشي وماله بس متنساش الباكت كله علي بعضه

اما بقي اجابة السؤال ليه هما كده واحنا كده
وليه مش هناكل خنزير ومش هنشرب ويسكي
؟
مش هناكل خنزير ومش هنشرب ويسكي لان ببساطة الجنة تستاهل

مش هناكل خنزير ومش حنشرب ويسكي عشان الدنيا عبارة عن لحظات وساعات وتنتهي
لكن الجنة نعيم مبينتهيش
يبقي نصبر في الدنياوزي ما بيقولوا- وما الدنيا الا صبر ساعة - ونفوز بعدها بنعيم الجنة اللي لا ينتهي وهناك حنشرب وناكل اللي احسن من كده مليون مرة

واحد said...

الأول كفار ودلوقتي خمرة وخنزير...الصنف شكله مضروب ياعلاء ...غير...وماتنساش تجيبلي تذكرة حلوة معاك

ولــــــــــو said...

ياعم هو لسه حد بيسافر ف مصر للطيران
وعلى فكره فيه بنات جامده ف مصر لو انت شايف ان المحجبات شكلهم تقيل على قلبك ماتبصش

حاول تغير وجهة نظرك وماتحكمش بالمظاهر

وبعدين ده من فضل ربنا علينا ان نسبه الالتزام زادت
هو احنا ناقصين فتن
يا رااجل بلاش كلام فارغ

elkamhawi said...

ولو

كلام فارغ اية يا بتاع انتا
لتتكلم باحترام ياتغور مش ناقصة فقع والنبى
عالم متخلفة صحيح

ذو النون المصري said...

ايه ياعم ؟
انت شويه عاوز تبقي امير الكفار و تاخد مبارك عندك عبد من العبيد
و بعدين عاوز تشرب ويسكي و تاكل خنازير؟
ياريت الحل في الويسكي و الخنازير
ياابني المشكله في الافكار السوده التي اعتقدنا باطلا انها من اسس الاسلام
البعض ظن ان البلي و التعفن و المنظر المشوه من دلالات الاسلام لانه بيبعد الفتنه عن قلب الرجال
مش عارف الفتنه في اوروبا مبتجيش ليه؟
اشمعني احنا بس اللي بنخاف من الفتنه؟

ذو النون المصري said...

بالمناسبه الفلات فوت اظنه ملهوش جلسات كهربا خالص لانه مجرد عيب خلقي في الرجلين و بيمنع صاحبه من لالتحاق بالخدمه العسكريه لان رجل المريض فيه مبيكونش فيها بطن مقعره مثلنا بل بتكون مبططه بالكامل مما يعوق حركة الجري السليم عنده
...........
موضوعاتك و افكارك جريئه

khaled said...

ايه يابنى الى انتا دخلت فيه ده
حاسب لحسن اخرته وحشه

elkamhawi said...

محمد ياسر

سبحان الله

احمد حربية

منور يا استاذ احمد
اكيد مش كل الناس اللى انا بتكلم عليهم كدة يعنى وانا مش قصدى الشكل بس انا قصدى النضافة والاحترام

الحلم العربى

سبحان الله

rana 3amra

انا مقلتش اننا كلنا مسلمين اصلا ولا كلنا هنخش الجنة انا بقول المفروض اننا مسلمين ومعظمنا هيخش الجنة

منورة

ياسمين

مين اللى قال انى جزمت انا بقول المفترض
وانا مؤمن جداً ان معظم المسحين اللى عايشين بره هيخشوا الجنة والكفار اللى عايشين هنا مش هيخشوها

واحدة بتحب البلد دي

ومين اللى قالك اننا هنخش الجنة...ويبقى خدنا مقلب تمام لادنيا ولا اخره

أحمد ندا

عيب عليك يا كبير

ذو النون المصري

والله عندك حق انتا الوحيد اللى فهمتنى
صدقنى ولا اى حد فاهم اى حاجة فى اى حاجة وادينا عايشين وخلاص حياه عبثية

khaled

يعنى اية اخرته وحش؟

لو كنت أعلم said...

لااااااااا
واضح إن دماغك عليت قوي لحد ماخبطت في السقف

لو فعلاً مش عارف الفرق

يبقى إنت محتاج تقرأدراسات عن الدين المقارن

وساعتها هتعرف

وبعدين مافي ناس ياما شكلها من بره حلو وجميل

ولكن داخلهم أطلال

راااجع حسباتك

وياريت دراسة بدراسة بقى
تشوفلنا موضوع الفلات فوت ده

بعد 14 سنة خدمة في طب
ولسه ما أعرفش إنت جايب المعلومة دي منين

باي يا(دوك)

AHMED SAMIR said...

ههههههههههههههههههههههههههه
تهييييس رسمي
بس والله موضوعاتك جميلة
بس حاسب علشان في ناس مابترحمش اللي بيهزروا في الحاجات دي
ربنا معاك

واحـــد مـــــن الـنـــاس said...

بقولك
انا كنت لسه هكتب رد
بس صدمت من ردك على .. ولو

ليه رديت عليه كده بس ؟؟؟

rana 3amra said...

:D
نسيت انك بتكره ضيق الافق اكتر من الخطيئة

Anonymous said...

كل واشرب...!!

بالتوفيق

Diyaa' said...

هو اللي يقولك كلامك كبير أو موضوعك جرئ يبقي زي العسل
علي فكرة
ولو قال
كلام فارغ ..يقصد النسوان العريانة ولحم الخنزير..أو هذا ما أعتقده
أما بالنسبة للنضافة والجمال...فأولاً المسلمين دلوقتي أغلبهم مسلمين بالاسم..فمفيش وجه مقارنة ...ثانياً..هتجيب واحدة صحابية يعني وتقارنها بواحدة من اللي شفتهم في المطار ؟
يعني أعتقد دماغك أكبر من كده
متهيألي حكمة ربنا في كده ..إنه سايبهم يعملوا اللي يعملوه وسايبهم ناسيين وجود ربنا ومتمتعين أوي بحياتهم وصعبان عليهم يستجيبوا لنواهيه بخصوص أكل الخنزير أو شرب الويسكي ..حتي لو مفيش ضرر ناجم عنهم..معتقدش إن الشجرة اللي أكل منها سيدنا أدم كانت ملوثة
لكنه نوع من الاختبار
وواضح إنك جبت ملحق
علي الأقل في البوست
لأن الهنود بيعبدوا البقر وعندهم مزز وسينما رهيبة وكمان تكنولوجيا كبيرة
إذن العيب في بعدنا عن الدين ..مش في الدين نفسه
هما بعاد عن الدين بس علي الأقل فالحين شوية في الدعارة المسماة بالحرية الشخصية ..بيعملوها بشكل مغري للغلابة اللي مشافوش لحمة بيضا
وفالحين في التقدم العلمي ..ومش فالحين في استخدامه دايماً بدليل هيروشيما وناجازاكي يا صديقي المتسائل هما ليه كده وأحنا كده
معرفش ..انت مستغرب ولا هتنفذ
بس ربنا يهديك ويهديني ويهدي المسلمين
كل صلاة بدعي إن ربنا يهدي المسلمين ومش عارف ده هيتم إمتي بس أكيد إحنا لو عايزين الهداية هننولها
لكن لو كل واحد ضعف أدام وركين عريانين وغير معتقداته مندهشا هما ليه مزز وأحنا مغطيين نفسهم فيبقي انسي الهداية دي خالص
معلش طولت عليك بس التساؤل استفزني لأنه متوقفش عند حد التساؤل
سلام عليكم

تائهة فى أرض الأحلام said...

يعنى هو اللى يخليك تاكل خنزير وتشرب ويسكى بس
البنات الأجانب وجمالهم وانك عندك احساس انهم هايخشوا النار
هههههههههههههههه
طيب لو كنت شوفت الرجالة الاجانب وجمالهم برده كنت عملت ايه ؟؟؟

اخى محتاج تعيد نظر فى اسلامك
حاول تقرأ وتتأمل وتفكر فى الكون والوجود وفى الأديان ولا تتخذ الموضوع بسطحية حتى لا تكن مجرد تائه بين ظلمات الجهل

تحياتى لك

elkamhawi said...

تائهة فى أرض الأحلام

اعيد نظر فى اسلامى؟؟

أنسانة-شوية وشوية said...

يابنى عايزة اعرفك ان الموضوع مش موضوع ويسكى وخنزير بدليل ان كلهم بياكلوا خنزير ويشربوا ويسمى وفيهم كتير مش حلويين من الاخر.
استغفر الله واتوضى وضلي ركعتين علشان تخش الجنة احسن من اويسكي والخنزير