الجايعة

كأى بنى ادم طبيعى ققرت فى يوم إنى انزل الجامعة بتاعتى بعد غياب دام حوالى شهرين يعنى اشوف الامتحانات والمحاضرات وده مع إنى مش مقتنع إنها جامعة اصلا وإنى ضيعت عمرى فى الفاضى وقال بنتعلم ..يعنى 15 سنة بصحى الساعة 7 الصبح من اول حضانه لحد الكليه وفى الاخر اية طظ ..طظ ومليون طظ..
المهم رحت الجامعة لقيت دى جى شغال فى الجامعة يمكن عيد ميلاد العميد و اتحاد الطلبه هى اللى منظماه(العنب العنب العنب) والناحية التانية مظاهرة "إخوان" اللى فى الجامعة (إصحى وقوم يا ابن الخطاب قالو على الاسلام إرهاب) المهم طبعاً الاغلبيه عند (العنب) المنظر غريب وفى ناس بترقص وحاجة مسخرة ققرت إنى اقعد اتفرج وعلى ما اظن الحكاية دى عند بين الاتحاد والاخوان وبعدين وانا بتفرج على الطلبه اللى راحة الجامعه عشان ترقص لقيت جيش إخوان هاجم على المسرح وبتاع الدجى وكل اللى واقف ومعاهم خشب وحديد وأخدوا عاطل فى باطل اللى كان واقف عند الدى جى كان بيتقص المهم الاتحاد بدورة بدأ يدافع عن نفسه وقامت معركة واللى انا مستغربله فين الامن !!مفيش أظن كانوا مستنين يستدعوا القوات اللى فى كازبلانكا ومشيت وسبتها بذمتكم دى جامعة دى ولا ده تعليم ده انا لو كنت فى مولد المضايقة مكنش حصل كدة والموضوع ده اتكرر تانى اول إمبارح انا مرحتش عشان زهقت بس الناس اتصلوا بيا
.لو ده التعليم .ولو دى الجامعة حد يقولى عشان بجد زهقــــــــــــــــــــــــــــــــت.

11 comments:

Anonymous said...

هو من غير ما أعرف انت في جامعة ايه ، الجامعات المصرية كلها حالها لا يسر عدو ولا حبيب .
كل جهة بتحاول تقمع الأخرى ..وده أصلا انعكاس للشارع المصري اللي بتسوده نفس الفوضى والقمع يه شغال على ودنه.
أظر حاجة بقى سائدة الأيام دي في الجامعة هما طلبة الاتحاد الرسمي.
الأسبوع اللي فات طاف اتحاد طلبة دار علوم في أنحاء جامعة القاهرة ماسكين يافطات " مسلمون نعم ، اخوانيون لا "
أنا أصلا مش اخوانية ، فلو أي حد عمل المظاهرة دي بس ليه أي ايدوليجية أحترمها كنت هقدر أتفهم وجهة نظره( حتى لو ما اتفقتش معاهم)
لكن لما طلبة الاتحاد اللي كلنا عارفينهم يعملوا المظاهرة دي بتبقى مفقوسة قوي( عالمة زي مظاهرات التأييد أيام ما كان يطق عليها الانتخابات الرئاسية)
طلبة اتحاد اداب بقى ماليين الكلية لوح وبيوزعوا منشورات بتقول (الاتحاد الحقيقي الذي يمثلكم)
سلامات للاتحاد الحقيقي.

سوري على الرغي بس انت قلبت عليا المواجع

Nasr Misr said...

كله بيخبط في بعضه، ان كان اخوان او حكومة.
سيبك انت، مفيش احلى من كفاية...

لا للتمديد.. لا للتوريث.. باطل

MAKSOFA said...

بس تعرف مسرحيه كوميديه بجد
ياريت كان معاك كاميرا ونقلت لنا الأحداث بالصور كان حايبقي البوست تحفه

elkamhawi said...

متغيرة شوية
هو باين الحال ده بقى فى كل الجامعات ومحدش عارف مين مع مين ولا مين على مين بس اللى ظاهر ان كل حاجة هتحصل برده غصب عننا.

مصرى
اه مريحة الدماغ

مكسوفه

على فكرة الكاميرا مش بتسيب ايدى على طول بس اليوم ده نسيتها وحتى كان فى امبارح دى جى واخد الكاميرا ووقفت مستنى معركة تانية بس مكنش فى نصيب حتى انا سالت بتاع الدى جى هو مفيش خناقة النهاردة تانى بصلى باستغراب وسكت.

Anonymous said...

مولد و صاحبه غايب
هذه هي بلدنا متناقضات في كل مكان
---
شد حيلك و خلص الجامعة
و خد شهادتك
و بعدين تعالى اقعد جنبنا نحن المتخرجون
و مصمص شفايفك علي حال البلد
---
شرفتنا يا فندم

elkamhawi said...

كلبوزة

قشطة هخلص بس وعد تحجزيلى مكااااااااان

tota said...

القمحاوى

غريبة الجامعة اليومين دول فعلا
كأنى بك تتحدث عن محراب غير الذى مررنا به يوما ما
ولم نسمع فيه قط عن الموسيقى الا فى حفلات الجامعة ولطالما كان جو الانتخابات متوترا لكن ابدا لم يكن فيه اسلحة وبلطجة
لا ادرى عيوب جيل ام عيوب دولة
لكن فى النهاية الصورة غير مشرفة لا للتعليم ولا للمتعلمين

هذا يفسر بقاءك فى المنزل
تحياتى

elgharep said...

تصدق وتؤمن بالله أنا لما شفت الصور فى الجرايد تصورت أن اللى بدأ هما طلبة الأتحاد لكن كلامك ده بيقول أن كلام الجرايد صحيح
شكرا على الحقيقة
الغريب

elkamhawi said...

tota
والله الحكاية شكلها مشكلة جيل ودولة وتربية وفكر وتنشئة و.....و...و..و... المشكلة ان فى ناس حاسة ان مفيش مشكلة وان ده التطور الطبيعى للحاجة الساقعه وشرفتنا يا فندم

الغريب

محدش عارف مين مع مين وعموما كان فى بلطجية حكومة كمان بس الامن نفس كان واقف بره
سلامات يا امن

Anonymous said...

اللى يغيظ انك لما تواجه مسئول يقولك محصلش

و الشعب حاله بيتردى جدا
من سئ لأسوأ

يعنى لا اخوان بعنف صح و لا العنب و الرقص كده صح

elkamhawi said...

انا حرة
ده اصلا لو عرفتى تزنقى المسؤل
هى شكلها كدة معادتش نافعة